ગાંધીનગરના રહેવાસીઓ માટે મહત્વના સમાચાર છે. આગામી 19મી એપ્રિલ, શનિવારના રોજ મોટેરા અને ગિફ્ટ સિટી વચ્ચેની મેટ્રો રેલ સેવા પાંચ કલાક માટે સ્થગિત રહેશે. મેટ્રો રેલ સલામતી કમિશનર આ રૂટ પર નિરીક્ષણ કરવાના હોવાથી આ નિર્ણય લેવામાં આવ્યો છે.
નિરીક્ષણના કારણે શનિવારે સવારે 8:00 વાગ્યાથી બપોરે 12:30 વાગ્યા સુધી આ રૂટ પર મેટ્રો ટ્રેનની સેવા બંધ રહેશે. નિરીક્ષણ કાર્ય પૂર્ણ થયા બાદ, 19મી એપ્રિલના રોજ જ બપોરે 1:00 વાગ્યાથી મેટ્રો ટ્રેન સેવા ફરીથી રાબેતા મુજબ શરૂ થઈ જશે. મુસાફરોને આ કામગીરીની નોંધ લેવા અનુરોધ કરવામાં આવ્યો છે.
