અમેરિકાના પૂર્વ રાષ્ટ્રપ્રમુખ જો બાઈડેને રશિયાના રાષ્ટ્રપતિ વ્લાદિમીર પુતિનની હત્યાનું કાવતરૂં ઘડ્યું હોવાનો દાવો થતાં અમેરિકાના રાજકારણમાં ખળભળાટ મચ્યો છે. અમેરિકામાં ટ્રમ્પના હિમાયતી અને રાજકારણના પંડિત તથા લેખક ટકર કાર્લસને આ દાવો કર્યો છે. ફોક્સ ચેનલના પૂર્વ એન્કરે તેના ‘ધ ટકર કાર્લસન શો’ પોડકાસ્ટના એપિસોડમાં જણાવ્યું હતું કે, ‘બાઈડેન સરકારે પુતિનને મારવાનો પ્રયાસ કર્યો હતો.’ આ અંગે આશ્ચર્ય પામતાં આ એપિસોડના ગેસ્ટ અમેરિકન લેખક અને પત્રકાર મેટ તૈબીએ ફરી પૂછ્યું, “ખરેખર?” જેના પર કાર્લસન ફરી પોતાના દાવા પર ભાર મૂકતાં કહે છે, ‘હા, હા, તેમણે કર્યો હતો.’ જોકે, કાર્લસને આ દાવાને સાબિત કરવા માટે કોઈ પુરાવા રજૂ કર્યા નથી.
