હસમુખ ઠાકોર, ગાંધીનગર: ગાંધીનગર જિલ્લાના માધવગઢ અને આસપાસના વિસ્તારોમાં તસ્કરોએ તરખાટ મચાવ્યો છે. છેલ્લા એક અઠવાડિયામાં માધવગઢ ગામ વિસ્તારમાં બેથી ત્રણ ટ્યુબવેલ પરથી મોટરના કિંમતી કેબલ વાયરની ચોરીની ઘટનાઓ સામે આવી છે. કમોસમી વરસાદથી પહેલાથી જ મુશ્કેલીમાં મુકાયેલા ખેડૂતો માટે આ ચોરીની ઘટનાઓ ‘પડતા પર પાટા’ જેવી સાબિત થઈ રહી છે.
હાલમાં આ મામલે પોલીસ ફરિયાદ નોંધાવવામાં આવી છે કે કેમ તેની કોઈ સત્તાવાર માહિતી મળી નથી. જો કે, એક જ વિસ્તારમાં ટૂંકા સમયગાળામાં થયેલી આ ચોરીની ઘટનાઓએ પોલીસ પેટ્રોલિંગની કામગીરી પર ગંભીર સવાલો ઊભા કર્યા છે. સ્થાનિક લોકોમાં એવી ચર્ચા ચાલી રહી છે કે જાણે ચોરોએ ચિલોડા પોલીસને ખુલ્લો પડકાર ફેંક્યો હોય. એક તરફ કમોસમી વરસાદે ખેતીના પાકને નુકસાન પહોંચાડ્યું છે, તો બીજી તરફ ટ્યુબવેલના વાયરની ચોરી થવાથી ખેડૂતો સિંચાઈથી પણ વંચિત રહી ગયા છે. જેના કારણે તેમના પાકને બચાવવાની આશા પણ ધૂંધળી બની રહી છે. ખેડૂતો આ ઘટનાઓથી ભારે પરેશાન અને ચિંતિત છે અને પોલીસ દ્વારા તાત્કાલિક પગલાં લેવાની માંગ કરી રહ્યા છે.
હજુ સુધી ચોરો કોણ છે અને કયા ઈરાદાથી આ ચોરીઓ કરી રહ્યા છે તે અંગે કોઈ માહિતી મળી નથી. આ ચોરીની ઘટનાઓએ વિસ્તારમાં ભય અને અસંતોષનો માહોલ સર્જ્યો છે. ખેડૂતો પોલીસ તંત્ર પાસેથી તાત્કાલિક કાર્યવાહી અને ન્યાયની આશા રાખે છે, જેથી તેમની આજીવિકા સુરક્ષિત રહે અને આવી ઘટનાઓનું પુનરાવર્તન ન થાય. પોલીસ દ્વારા આ ઘટનાઓની ગંભીરતાથી તપાસ કરવામાં આવે અને તસ્કરોને પકડીને કાયદેસરની કાર્યવાહી કરવામાં આવે તે જરૂરી છે, જેથી ખેડૂતોને રાહત મળી શકે.
