ગુજરાત રાજ્યના વિલેજ કમ્પ્યુટર એન્ટરપ્રેન્યોર (VCE) કર્મચારીઓએ આજે ગાંધીનગરના સત્યાગ્રહ છાવણી ખાતે ધરણા પ્રદર્શન કર્યું હતું. સરકાર દ્વારા વારંવાર આપવામાં આવેલી બાંહેધરીઓ પૂર્ણ ન થતાં, VCE કર્મચારીઓએ આંદોલનનો માર્ગ અપનાવ્યો હતો. જો કે, આંદોલન શરૂ થતાં જ પોલીસે તમામ કર્મચારીઓની અટકાયત કરી હતી.
VCE કર્મચારીઓની મુખ્ય માંગણીઓ:
* કમિશન પ્રથા બંધ કરવી અને નિયમિત પગાર ધોરણ લાગુ કરવું.
* લઘુત્તમ વેતન ધારો અમલમાં મૂકવો.
* ઇ-ગ્રામ પોલિસીમાં ફેરફાર કરવો.
સરકારની બાંહેધરીઓ અને કર્મચારીઓનું શોષણ:
VCE કર્મચારીઓ છેલ્લા 8 વર્ષથી તેમની વિવિધ માંગણીઓ માટે સતત રજૂઆતો કરી રહ્યા છે. મહત્વની વાત એ છે કે, ખુદ મંત્રીઓ પણ સ્વીકારી રહ્યા છે કે તલાટી ન હોય તો ચાલશે, પરંતુ VCE વગર ગામનું વહીવટી કામકાજ ચલાવવું મુશ્કેલ છે. આમ છતાં, VCE કર્મચારીઓનું આર્થિક શોષણ સતત ચાલી રહ્યું છે, જે કર્મચારીઓમાં ભારે રોષનું કારણ બન્યું છે.
રાજ્યવ્યાપી આંદોલન અને પોલીસ કાર્યવાહી:
આંદોલન દરમિયાન પોલીસે રાજ્યભરમાંથી આવેલા મોટી સંખ્યામાં VCE કર્મચારીઓની અટકાયત કરી હતી. કર્મચારીઓનું કહેવું છે કે, જ્યાં સુધી તેમની માંગણીઓ સ્વીકારવામાં નહીં આવે ત્યાં સુધી તેઓ આંદોલન ચાલુ રાખશે.
VCE કર્મચારીઓની કામગીરી:
ગુજરાત રાજ્યની ગ્રામ પંચાયતોમાં કાર્યરત વિલેજ કોમ્પ્યુટર ઓપરેટર એટલે કે VCE ગામડાઓમાં સરકારી કામોમાં પ્રજાને મદદરૂપ થાય છે. તેઓ મહેસુલ, અન્ન પુરવઠા, પંચાયત, ચૂંટણી સહિતની કામગીરી કરે છે.
